◆ नागरिकांना सतर्क राहण्याचे प्रशासनाचे आवाहन
वणी वृत्तवेध :दि. 29 व 30 मे 2026 रोजी वणी परिसरात वादळी वाऱ्यासह मुसळधार पावसाची शक्यता हवामान विभागाने वर्तविली आहे. या पार्श्वभूमीवर जिल्हा आपत्ती व्यवस्थापन प्राधिकरण, यवतमाळ यांनी नागरिकांना सतर्क राहण्याचे आवाहन केले आहे.
वादळी वातावरणामुळे झाडे, विजेचे खांब किंवा कमकुवत बांधकामे कोसळण्याचा धोका निर्माण होऊ शकतो. त्यामुळे नागरिकांनी घराबाहेर पडताना आवश्यक ती खबरदारी घ्यावी, असे प्रशासनाने सांगितले आहे.
मार्गदर्शक सूचनांमध्ये कच्च्या घरांमध्ये राहणाऱ्या नागरिकांनी सुरक्षित ठिकाणी स्थलांतर करावे, नदी-नाले, तलाव परिसरात जाणे टाळावे तसेच वीज कडकडाट सुरू असताना झाडाखाली उभे राहू नये, असे नमूद करण्यात आले आहे. शेतकऱ्यांनी शेती साहित्य व जनावरे सुरक्षित स्थळी हलवावीत, असेही आवाहन करण्यात आले आहे.
आपत्कालीन परिस्थितीत नागरिकांनी जिल्हा नियंत्रण कक्षाशी संपर्क साधावा. आपत्ती व्यवस्थापन विभागाचे हेल्पलाईन क्रमांक 07232-240720 आणि पोलीस नियंत्रण कक्ष 07232-256700 जारी करण्यात आले आहेत.
