◆ ‘नाट्य वेडा लोकशिक्षक’ मुलाखत प्रसारित
वणी वृत्तवेध : बहुआयामी व्यक्तिमत्त्व असलेले लोक कलावंत डॉ. दिलीप अलोने यांची ‘नाट्य वेडा लोकशिक्षक’ या शीर्षकाखालील विशेष मुलाखत येत्या शुक्रवारी दुपारी १२ वाजता सह्याद्री दूरदर्शन वाहिनीवर प्रसारित होणार आहे.
ख्यातनाम लेखक व सूत्रसंचालक डॉ. विवेक अलोनी यांनी डॉ. अलोने यांच्या विविध पैलूंवर प्रकाश टाकणारी ही प्रदीर्घ मुलाखत घेतली आहे. या कार्यक्रमाच्या निर्माती नागपूर दूरदर्शनच्या मीनल पाठराखे आहेत.
प्रयोगशील शेतकरी, विद्यार्थीप्रिय शिक्षक, जादूगार, नकलाकार, नाट्यलेखक व अभिनेते अशा विविध क्षेत्रांत उल्लेखनीय कार्य करणाऱ्या डॉ. दिलीप अलोने यांच्या सर्वांगीण व्यक्तिमत्त्वाचा परिचय करून देणारा ‘मस्त कलंदर’ हा ग्रंथ लवकरच प्रकाशित होणार आहे. या ग्रंथाचे संपादक डॉ. मनोहर सुरवाडे आहेत.
तसेच त्यांच्या कार्यकर्तृत्वाचा गौरव करणारा ‘लोक रंगभूमी आणि लोक वाङ्मय’ हा ग्रंथही प्रकाशनाच्या मार्गावर असल्याची माहिती मिळाली आहे.
