घरातच सुरू होता प्रतिबंधित बियाण्यांचा काळाबाजार

◆ कृषी विभागाची धडक कारवाई
◆ लाखांचे अवैध कापूस बियाणे जप्त

वणी वृत्तवेध :शेतकऱ्यांच्या जीवाशी खेळणाऱ्या प्रतिबंधित कापूस बियाण्यांच्या अवैध विक्रीवर अखेर कृषी विभागाने मोठी कारवाई करत वणी तालुक्यातील पळसोनी येथे तब्बल १ लाख १५ हजार ७० रुपयांचे अनधिकृत कापूस बियाणे जप्त केले. या प्रकरणामुळे परिसरात मोठी खळबळ उडाली असून “घरातूनच बियाण्यांचा काळाबाजार” सुरू असल्याची चर्चा रंगली आहे.

जिल्हा गुणवत्ता नियंत्रण निरीक्षक, जिल्हा अधीक्षक कृषि अधिकारी कार्यालय यवतमाळ यांच्या फिर्यादीवरून आरोपी अरुण शंकर भट (वय ४५, रा. पळसोनी ता. वणी) याच्याविरोधात बियाणे अधिनियम १९६८ तसेच पर्यावरण संरक्षण अधिनियम १९८६ अंतर्गत गुन्हा दाखल करण्यात आला आहे.

दि. ६ मे रोजी रात्री ९ ते ९.२० वाजताच्या दरम्यान कृषी विभाग व पोलिसांनी संयुक्त कारवाई करत आरोपीच्या राहत्या घरावर छापा टाकला. यावेळी विविध नावांनी विक्रीस ठेवलेले “Pinkgard”, “5G”, “Research Hybrid” अशा लेबलचे प्रतिबंधित बीटी कापूस बियाण्यांचे तब्बल ८१ पाकिटे आढळून आली.

जप्त करण्यात आलेल्या बियाण्यांमध्ये “माऊली-5”, “SURAKSHA”, “GALAXY HYPER”, “KAVERI SEEDS”, “JUMBO 5G”, “SILVER 5G”, “DHOOM 2” यांसारख्या विविध ब्रँडचा समावेश आहे. अनेक पाकिटांमधून नमुने घेऊन बीज परीक्षण प्रयोगशाळेकडे तपासणीसाठी पाठविण्यात आले आहेत.विशेष म्हणजे केंद्र शासनाने प्रतिबंधित केलेल्या बियाण्यांची विक्री केल्यास शेतकऱ्यांचे मोठे आर्थिक नुकसान होण्याची शक्यता असते. अशा बियाण्यांमुळे उत्पादन घटणे, कीडप्रादुर्भाव वाढणे तसेच पीक पूर्णपणे नष्ट होण्याचा धोका असल्याने कृषी विभाग सतर्क झाला आहे.
या कारवाईमुळे तालुक्यात अवैध बियाणे विक्रीचे मोठे रॅकेट कार्यरत असल्याची शक्यता व्यक्त होत असून कृषी विभाग आता आणखी तपासाच्या तयारीत आहे.