७ हजारांहून अधिक मुद्देमाल जप्त
वणी वृत्तवेध :वणी शहरातील लालगुडा चौफुली परिसर तसेच ज्योती बार गल्ली परिसरात सुरू असलेल्या अवैध जुगार अड्ड्यांवर वणी पोलिसांनी धाड टाकून चार जणांविरुद्ध जुगार कायद्यान्वये कारवाई केली. ही कारवाई दि. २४ एप्रिल २०२६ व ८ मे २०२६ रोजी करण्यात आली.
या प्रकरणी आरोपी म्हणून गोपी किसन लोणारे (रा. रामपुरा वार्ड, वणी), अमित किसन घेडांगे (रा. भाग्यशाली नगर, वणी), मंगेश बबन बदखल (रा. भालर) व अजय बलेश्वर मांझी (रा. रंगनाथ नगर, वणी) यांच्यावर गुन्हा दाखल करण्यात आला आहे.
कारवाईदरम्यान पोलिसांनी एकूण ७ हजार १६० रुपयांचा नगदी मुद्देमाल जप्त केला. वणी पोलीस प्रशासनाकडून सातत्याने माहिती संकलन करून विशेष पथकांच्या माध्यमातून अवैध जुगार अड्ड्यांवर छापेमारी सुरू असल्याचे सांगण्यात आले.
अवैध धंद्यांचे समूळ उच्चाटन करण्यासाठी अशा कारवाया पुढेही अधिक प्रभावीपणे राबविण्यात येणार असल्याचे ठाणेदार गोपाल उंबरकर यांनी स्पष्ट केले आहे. तसेच नागरिकांनी परिसरातील बेकायदेशीर प्रकारांची माहिती पोलिसांना देऊन सहकार्य करावे, असे आवाहन पोलीस निरीक्षक, पोलीस स्टेशन वणी यांनी केले आहे.
