Chandataknews
Chandrapur
चंद्रपूर जिल्ह्यातील बल्लारपूर इन्स्टिट्यूट ऑफ टेक्नॉलॉजी (BIT), बामनी येथे आज २४ तासांचा ‘हॅकाथॉन 2025’ उत्साहात सुरू झाला आहे. हा उपक्रम ताडोबा-अंधारी वाघ अभयारण्य (TATR) आणि महाराष्ट्र शासन यांच्या सहकार्याने आयोजित करण्यात आला आहे. “तंत्रज्ञानाद्वारे सहअस्तित्वासाठी नवनिर्मिती” या थीमअंतर्गत विद्यार्थी मानव आणि वन्यजीवन यांच्यातील समतोल साधण्यासाठी आधुनिक तंत्रज्ञानावर आधारित उपाय शोधण्याचे उद्दिष्ट या हॅकाथॉनमागे आहे.
कार्यक्रमाची सुरुवात सरस्वती वंदनाने झाली. त्यानंतर मान्यवरांचे स्वागत व सन्मान करण्यात आले. उद्घाटन Product & Strategy Consultant आणि Leadership Coach मिस रुची टंडन यांच्या हस्ते झाले. IBM, Microsoft, Amazon आणि Samsung यांसारख्या जागतिक तंत्रज्ञान कंपन्यांमध्ये 20 वर्षांहून अधिक अनुभव असलेल्या मिस टंडन या BITS पिलानीच्या माजी विद्यार्थिनी असून त्यांनी अमेरिकेतून उच्च शिक्षण घेतले आहे.
आपल्या उदघाटनपर भाषणात त्यांनी सांगितले की, या हॅकाथॉनमधील आव्हाने केवळ स्थानिक नसून जागतिक आहेत. टिकाऊ उपाय शोधताना विद्यार्थ्यांनी तंत्रज्ञानाचा नाविन्यपूर्ण वापर करावा, असे त्यांनी आवर्जून नमूद केले.
या प्रसंगी BIT चे कार्याध्यक्ष श्री. संजय वसाडे, प्राचार्य व संचालक डॉ. राजनीकांत मिश्रा, प्रा. श्रीकांत गोजे, डॉ. झेड. जे. खान, प्रा. सी. सत्यनारायण, डॉ. अर्चना निमकार आणि श्री. लव्हली शर्मा उपस्थित होते.
कार्यक्रमाचे सूत्रसंचालन BIT चे विद्यार्थी आदित्य वैरागडे (द्वितीय वर्ष सिव्हिल अभियांत्रिकी) आणि रागिणी यादव (द्वितीय वर्ष इलेक्ट्रॉनिक्स अभियांत्रिकी) यांनी केले.
BIT आणि TATR यांचा हा संयुक्त उपक्रम शिक्षण, तंत्रज्ञान आणि पर्यावरण संवेदनशीलतेचा सुंदर संगम ठरला आहे. या माध्यमातून युवकांना संतुलित व समतोल जगासाठी नवनिर्मितीची प्रेरणा दिली जात आहे.
एकूण २५ संघ या २४ तासांच्या हॅकाथॉनमध्ये सहभागी झाले असून ते नागपूर, चंद्रपूर, वर्धा, तेलंगणा आणि BIT कॉलेज येथून आले आहेत. या दरम्यान त्यांना मार्गदर्शन, तज्ज्ञांचे *mentorship* आणि औद्योगिक तज्ज्ञांकडून मुल्यमापनाची संधी दिली जात आहे.
कार्यक्रमाच्या यशस्वीतेसाठी BIT च्या सॉफ्टवेअर डेव्हलपमेंट टीममधील पियुष गुप्ता आणि सर्बानी सिन्हा तसेच अभियांत्रिकी विद्यार्थी आदित्य यादव आणि रोहित अप्पलवार यांनी मेहनत घेतली आहे.
