◆ हातोड्याने डोक्यावर प्रहार
◆ टीव्ही मेकॅनिक गंभीर
वणी वृत्तवेध : शहरातील सावरकर चौक परिसरात आज दि. 1 मे पैशांच्या किरकोळ वादाने थेट हिंसक वळण घेत एक धक्कादायक घटना घडली. टीव्ही दुरुस्ती करणाऱ्या इसमाच्या डोक्यात हातोड्याने जबरदस्त प्रहार करून त्याला गंभीर जखमी करण्यात आले.
मिळालेल्या माहितीनुसार, दिलीप नासरे हे टीव्ही दुरुस्तीचे काम करतात. संदीप साखरकर याने आपल्या घरातील बिघडलेला टीव्ही दुरुस्तीसाठी नासरे यांच्याकडे दिला होता. मात्र दुरुस्तीला विलंब होत असल्याने साखरकरने नवीन टीव्ही खरेदी केला आणि आधी दिलेले पैसे परत मागितले.
यावरून दोघांमध्ये वाद पेटला. पैशांच्या परतफेडीवरून सुरू झालेली बाचाबाची काही क्षणातच हाणामारीत बदलली. संतापाच्या भरात संदीप साखरकर याने हातोडा उचलत दिलीप नासरे यांच्या डोक्यावर जोरदार वार केला. या भीषण हल्ल्यात नासरे गंभीर जखमी झाले असून त्यांना तातडीने उपचारासाठी चंद्रपूर येथे हलविण्यात आले आहे.
घटनेनंतर परिसरात एकच खळबळ उडाली. पोलिसांनी तातडीने कारवाई करत आरोपी संदीप साखरकर याला ताब्यात घेतले असून पुढील तपास सुरू आहे. वृत्त लिहेपर्यंत या प्रकरणी गुन्हा नोंद करण्याची प्रक्रिया सुरू होती.
