घोषणा नाही, कृतीतून दाखवली सामाजिक बांधिलकी

◆ नंददीप फाउंडेशनला ५० हजारांची मदत

वणी वृत्तवेध :आजच्या काळात मंचावर अनेक आश्वासने दिली जातात; मात्र ती प्रत्यक्षात पूर्ण करणारे हात फार कमी असतात. वणीचे माजी आमदार तथा सामाजिक कार्यात नेहमीच अग्रेसर असलेले संजीवरेड्डी बोदकूरवार यांनी दिलेला शब्द पाळत नंददीप फाउंडेशन, यवतमाळ यांना ५० हजारांची आर्थिक मदत देऊन सामाजिक बांधिलकी जपली आहे.

मागील महिन्यात वणी येथे झालेल्या एका कार्यक्रमात नंददीप फाउंडेशनच्या सेवाकार्याची माहिती व्हिडिओच्या माध्यमातून उपस्थितांसमोर मांडण्यात आली होती. बेघर, निराधार, मनोरुग्ण आणि मतिमंद बांधवांसाठी सुरू असलेले कार्य पाहून अनेकजण भावूक झाले होते.

या कार्यक्रमात माजी आमदार संजीवरेड्डी बोदकूरवार यांनी लायन्स इंग्लिश मिडीयम स्कूल कडून नंददीप संस्थेला ५० हजारांची मदत देण्याची घोषणा केली होती त्यांनी नुकतीच यवतमाळ येथे जाऊन नंददीप फाउंडेशनच्या पदाधिकाऱ्यांकडे प्रत्यक्ष धनादेश सुपूर्द केला आहे यावेळी संस्थेच्या पुस्तकात त्यांनी सेवाकार्याबद्दल आपला अभिप्राय नोंदवून संस्थेच्या कामाचे कौतुक केले आहे.

समाजातील वंचित आणि दुर्लक्षित घटकांच्या पुनर्वसनासाठी कार्य करणाऱ्या संस्थांना अशा प्रकारच्या मदतीची मोठी गरज असते. या सहकार्यामुळे संस्थेच्या कार्याला आर्थिक बळ मिळाले असून समाजातील इतर दानशूर व्यक्तींनाही प्रेरणा मिळणार आहे.

नंददीप फाउंडेशनच्या वतीने त्यांच्या या मदतीबद्दल कृतज्ञता व्यक्त करण्यात आली असून, “दानाची किंमत रकमेपेक्षा त्यामागील संवेदनशीलतेत असते,” अशा भावना संस्थेच्या पदाधिकाऱ्यांनी व्यक्त केल्या