चंद्रपूर, 4 जुलै – चंद्रपूर महापालिकेच्या स्वच्छता विभागात आजपासून ‘ट्रक माउंटेड – हाय सिवेज सक्शन मशीन’ कार्यान्वित करण्यात आली आहे. या आधुनिक यंत्रामुळे भूमिगत नाले, गटार, मेनहोल्स आणि नाल्यांची सफाई आता अधिक जलद, कार्यक्षम आणि यांत्रिक पद्धतीने होणार आहे. पारंपरिक पद्धतीत लागणारा वेळ व श्रम मोठ्या प्रमाणात वाचणार असून, विशेषतः पावसाळ्यातील नालेसफाई अधिक प्रभावीपणे करता येणार आहे.
महानगरपालिका आयुक्त विपीन पालीवाल यांच्या मार्गदर्शनाखाली मशीनचे ट्रायल रन घेण्यात आले. यावेळी शोषण क्षमता, दाब नियंत्रण, व जलप्रवाह व्यवस्थापन याची तपासणी करण्यात आली. मशीनची क्षमता 4000 लिटर असून, बंद गटारांमधून त्वरित सांडपाणी काढण्यासाठी आणि परिसर दुर्गंधीमुक्त ठेवण्यासाठी हे यंत्र उपयुक्त ठरणार आहे.
हे कसे कार्य करते:
मशीनमध्ये शक्तिशाली सक्शन पंप असतो, जो नोजल किंवा ट्यूबद्वारे सीवेज लाइनमध्ये सक्शन तयार करतो.
हे सक्शन चिखल आणि द्रव मशीनच्या टाकीत खेचते.
नंतर ही टाकी रिकामी करून कचरा योग्य विल्हेवाटीसाठी नेला जातो.
मुख्य फायदे:
कार्यक्षमता: कमी वेळेत मोठ्या प्रमाणावर सांडपाणी आणि गाळ काढता येतो.
परिणामकारकता: मोठ्या प्रमाणातील गाळ व चिखल देखील सहज काढता येतो.
सुरक्षा: सफाई कामगारांना धोकादायक परिस्थितीत उतरावे लागत नाही.
पर्यावरण संरक्षण: सांडपाणी व्यवस्थित हाताळल्यामुळे प्रदूषण कमी होते.
खर्च प्रभावी: स्वच्छता खर्चात बचत.
देशातील इतर शहरांमध्येही अशा अत्याधुनिक यंत्रांचा वापर वाढत असून, दिल्लीसारख्या शहरांमध्ये देखील सीवर सफाईसाठी मशीन वापरून मानवी जीवितास धोका कमी करण्याचा प्रयत्न सुरू आहे. चंद्रपूर महापालिकेची ही पायरी शहराच्या स्वच्छतेसाठी एक महत्त्वाचा टप्पा ठरणार आहे.
